ஹோமியோபதி மருத்துவர்கள் போலி டாக்டர்கள் அல்ல

“எம்பிபிஎஸ் படித்தவர்கள் மட்டுமே டாக்டர்கள் என்று போலீசார் தவறாக நினைக்கிறார்கள். இது தவறு” என்று ஹோமியோபதி டாக்டர்கள் விளக்கம் அளித்துள்ளனர்.

தமிழகத்தில் 2 ஆயிரத்துக்கும் மேற்பட்ட போலி டாக்டர்கள் இருப்பதாக புகார் கூறப்பட்டது. இதைத்தொடர்ந்து, கடந்த சில நாட்களாக போலீசார் சோதனை நடத்தி, போலி டாக்டர்களை கைது செய்து வருகிறார்கள். எம்பிபிஎஸ் தவிர சித்த மருத்துவம், ஆயுர்வேதம், ஹோமியோபதி படித்து கிளினிக் நடத்தி வந்தவர்களையும், போலி டாக்டர்கள் என்று கூறி போலீசார் கைது செய்கிறார்கள் என்று குற்றம் சாட்டப்பட்டது. இதற்கு விளக்கம் அளிக்கும் வகையில், தமிழக மக்கள் நல்வாழ்வுத் துறையின் முதன்மைச் செயலாளர் வி.கே.சுப்புராஜ், “ஆயுர்வேதம், சித்த மருத்துவம், ஹோமியோபதி படித்த டாக்டர்கள் யாரும் கைது செய்யப்பட மாட்டார்கள்” என்று உறுதி அளித்திருந்தார். இந்நிலையில், தமிழ்நாடு ஹோமியோபதி மருத்துவ கவுன்சில் பதிவாளர் டாக்டர் சவுந்தரராஜன், சென்னையில் நேற்று நிருபர்களிடம் கூறியதாவது: தமிழகத்தில் போலி மருத்துவர்களை அரசு கைது செய்து வருகிறது. இதில் பதிவு பெற்றவர்கள் மற்றும் பட்டம் பெற்ற ஹோமியோபதி டாக்டர்களையும், போலி மருத்துவர்கள் என்று கூறி போலீசார் இடையூறு செய்கிறார்கள். இதனால், தமிழகத்தில் சில ஹோமியோபதி டாக்டர்கள் பாதிக்கப்பட்டுள்ளனர். எம்பிபிஎஸ் படித்தவர்கள் மட்டுமே டாக்டர்கள் என்று போலீசார் தவறாக நினைக்கிறார்கள். ஹோமியோபதி டாக்டர்களும் எம்பிபிஎஸ் படிப்புக்கு இணையாக ஐந்தரை ஆண்டு படித்து பட்டம் பெற்று, கிளினிக் நடத்த அரசால் அங்கீகரிக்கப்பட்டுள்ளனர். இப்படி அனுமதிக்கப்பட்ட ஒருவரை போலீஸ் ஜீப்பில் ஏற்றிச் செல்வதே தவறாகும். மக்கள் நல்வாழ்வுத்துறை செயலாளரின் உத்தரவுப்படி, ஹோமியோபதி டாக்டர்களை போலீசார் இனி தொந்தரவு செய்யக்கூடாது. இவ்வாறு டாக்டர் சவுந்தரராஜன் கூறினார். ---